Taga Negros natanggong sa Bato Port

CEBU, Philippines — Ubay ubay nga taga Negros ang natanggong sa pantalan sa Bato sa Samboan nga gusto untang mopauli unta didto sa ilang probinsya apan naabtan sa pagpanirado sa mga utlanan didto tungod sa coronavirus disease (COVID19).

Sa giluwatan nga executive order ni Negros Oriental Gov. Roel Degamo niadto rang Marso 28 ang gihatag nga lugway para sa mga residente sa Negros nga makalabang ngadto sa ilang lalawigan gikan sa Probinsya sa Sugbo.

“Extending the deadline for residents or person originally from Negros Oriental who are stranded in other Provinces to return or come home to the Province of Negros Oriental until 12:01am of March 28, 2020,” pagbasa sa EO No. 2020-25 ni Degamo.

Apan karon ubay- ubay nga posts sa social media ang nagpakita nga daghang mga taga Negros ang wala makaapas sa maong lugway ug natanggong karon sa maong pantalan.

“Naay mga stranded dri karun sa bato naai mga dalang bata. hinaot unta naai maka donate ug gatas ug diaper kai wla jud clai ika provide na. kame pud mga gaduty dri gatampo2 napud me,” pagbasa sa post sa usa ka Royden Ruisana kagahapon Marso 29,2020.  Pipila usab sa mga hulagway nga makita ang makaluluoy nga kahimtang sa mga pasahero nga wala magasunod sa social distancing. /IBM (BANATNEWS)