Garcia: Stay at home ra gyud

CEBU, Philippines — Gihisgotan ug gikalibgan sa katawhan kining mga gipatumang quarantine nunot niining pagkatap sa coronavirus COVID19.

Aron maklaro ang kalainan sa usa’g usa, si Gobernador Gwendolyn Garcia mipasabot nga bisan unsa pay tawag sa gihimong restrictions sa tibook lalawigan usa ra ang buot pasabot niini, mao ang pagpuyo sa balay.

“What it really means, bottom line is, stay at home. There now has to be a restriction of free movement in each of our LGUs… Ang simply ra gyud ana kadtong naglibog, enhanced community quarantine ba o lockdown, stay at home. Mao ra gyud na,” matud ni Garcia.

Ubay ubay nga mga tawo ang naglibog kun unsay sakto nga terminong gamiton. Ang uban nagkanayon nga lockdown , adunay uban nagtoo nga enhanced community quarantine ang tawag sa gihimong lakang karon sa gobyerno batok COVID19.

Si Garcia nagkanayon nga usa ray angay himoon sa publiko, kini mao ang pagsunod “restrictions” sa kalihokan sa mga tawo.

Matod sa gobernador, gihimo kini aron paglikay nga mokatap ang coronavirus disease.

“It is also for your protection, do not expose yourselves to possible carriers, on the other, if you are a carrier, an asymptomatic carrier, do not expose others,” matud ni Garcia. /IBM (BANATNEWS)