DepEd niawhag sa mga pribadong eskwelahan nga motuman sa mando

CEBU, Philippines — Ang Department of Education (DepEd) niawhag sa mga pribadong tulunghaan nga motuman sa kamandoan sa lokal nga kagamhanan nga hunongon lang una ang pagpahigayon og online classes human si Gobernador Gwendolyn Garcia hingpit nang nipatuman ug 24-hour curfew sa mga tinun-an sa tanang ang-ang ug senior citizens nga nagpangedaron og 65-anyos pataas.

Matud ni Amaryllis Villarmia, information officer sa DepEd-7 nga wala nay klase nga gihimo sa tanang pampublikong tunghaan bisan sa online.

Sa ulahing memorandum circular nga giluwatan sa DepEd ang mga publikong eskwelahan nga wala nakahimo og final exams kinahanglan gihapon silang mohatag og final nga grado sa ilang mga tinun-an base sa performance ug points nga gihimo niini sa dihang aduna pay klase.

Si Villarmia nagkanayon nga kong aduna pay mga eskwelahan nga nipahigayon og online classes posibleng mga private school kini ug wala silay gahom sa pagpahunong niini tungod kay aduna man kini mga lagda nga gisunod itandi sa mga pampublikong tunghaan.

Hinuon si Villarmia niawhag kini sa mga school management nga unta motuman lang sa lagda nga giluwatan sa kagamhanan tungod kay alang kini sa kaayohan sa tanan. /BDB (BANATNEWS)