Maghalad lang og buwak atol sa Takas sa Talisay
CEBU, Philippines — Magmingaw karong adlawa ang ika-75 ka tuig nga kasaulogan sa Takas sa Talisay o ang Landing.
Kini human si Mayor Gerald Anthony “Samsam” Gullas Jr. ug ang tourism office nagkasinabot nga walay tapok-tapok nga ipahigayon. Subay kini sa kamandoan ni Governor Gwendolyn Garcia aron kalikayan ang pagkatap sa mga sakit nga posibleng mapasa sa isig ka tawo niining giatubang karon nga krisis sa panglawas sa pagkuyanap sa covid-19.
Si Mikki Aznar, pangulo sa Tourism Office sa siyudad nagkanayon nga maghalad nalang sila og buwak sa monyumento inig ka human mobalik dayon sila sa ilang mga trabaho.
Sa wala pa gipahugtan ang social distancing una nang nipadayag si Gullas nga simple nga selebrasyon lang ang pagahimuon.
Ilahang una nga plano mao ang paghalad og Santos nga Misa dayon ang paghalad og buwak.
Apan tungod sa estriktong pagpatuman sa social distancing og curfew kanselado ang tanan nila nga unang plano.
Dugang ni Aznar nga labing maayo nga motuman sa mga precautionary measure paglikay sa covid-19. /BDB (BANATNEWS)
- Latest
