Mga polis, kapitan mag-atubang og kaso

CEBU, Philippines — Gipaubos na og imbestigasyon sa Cebu City Police Office ang mga polis sa Abellana Police Station nga niresponde apan wala nidakop sa kapitan sa Barangay Kalunasan didto sa Barangay Kamputhaw.

Kini maoy gibutyag ni CCPO Director Hector Grijaldo human sa pag-viral sa video diin giingong nakainom si Kapitan Nunilon Monares bisan sa pagpatuman sa curfew.

Dugang ni Grijaldo nga kuhaan sad nila og pamahayag ang mga saksi aron pagsuta kung naka-inom ba gyud ang kapitan.

Usa sa mga kuhaan og impormasyon ang mga opisyal sa Kamputhaw nga niadtong higayuna uban sa mga polis.

Gimanduan ni Grijaldo ang hepe sa Abellana Police Station nga iyang ipaubos sa imbestigasyon ang mga sakop niini kung nganong wala dakpa ug wala i-blotter ang kapitan. Gipasabot ni Grijaldo nga mamahimong mag-atubang og kasong administratiba ang mga polis sa pakyas sa pagdakop sa kapitan kung mapamatud-an kini sa imbestigasyon.

Si Monares ang posibleng mapasakaan og kasong kalapasan sa Republic Act 6713 kon Code of Conduct for Public Officials and Employees kun mamatud-an nga nakig-inom siya sa iyang mga higala samtang nagpatuman og curfew ang dakbayan.

Matud ni City Legal Officer Rey Gealon nga base sa kamanduan ni Mayor Edgardo Labella, ang iyang buhatan nagtukod og komitiba sa tulo ka abogado nga mohimo og imbestigasyon sa kaso sa kapitan.

Dugang ni Gealon nga sa pagkakaron ang ilang gihuptan kadto lang video nga anaa ang kapitan nga nikatap sa social media diin uban ang pipila ka tawo nga naaktohan sa kapolisan nga nagtagay.

Sumala pa ni Gealon nga makig-alayon sila sa kapolisan may kalabutan sa maong insidente ug lakip usab ang pagsusi sa mga ebidensya nga magpamatuod nga nakalapas sa liquor ban ug uban pa ang kapitan ug kaubanan niini.

Dugang ni Gealon nga ubos sa R.A. 6713, ang mga opisyal ug mga kawani sa gobiyerno sa tanang higayon magpuyo sa sulondon nga kinabuhi ug mopabarug sa interest sa katawhan ug labaw sa personal nga kabulahanan. Rowena D. Capistrano/GMR (BANATNEWS)