Ahong mohangyo sa total lockdown sa MCIA

CEBU, Philippines — Hangyuon ni Lapu-Lapu City Mayor Junard “Ahong” Chan si Presidente Rodrigo Duterte aron ipatuman ang total lockdown sa Mactan-Cebu International Airport aron maseguro ang kaluwasan sa mga Oponganon.

Sa Facebook page sa mayor gitug-an niini nga napuno na ang mga hotels ug pension houses nga kabutangan sa mga gi-quarantine nga mga langyaw. Matud ni Chan nga ang proteksyon sa iyang katawhan maoy iyang prayoridad ug hugtanon niyang gipangayo ang pagtugot sa Presidente aron mawala ang kabalaka sa katawhan. Nipagawas og executive order ang Department of Transportation sa pag-ban sa mga langyaw nga mosulod sa siyudad niadtong Marso 22. Ang mga langyaw dili makasulod sa siyudad o pwede sila moderetso sa silingang siyudad apan kinahanglan mopaubos sa 14-day quarantine.

Gibutyag ni Chan nga kung padayon ang pagsulod sa mga langyaw sa airport, mas modaku ang risgo sa posibleng pagtakod sa COVID-19. /GMR (BANATNEWS)