CCTO morekomendar paglibkas sa truck ban
CEBU, Philippines — Ang Cebu City Transportation Office (CCTO) morekomendar ni Mayor Edgardo Labella sa paglibkas sa truck ban ilabi na kadtong mga truck nga nagkarga og essential goods.
Si Atty. Rey Gealon, pangulo sa City Legal Office ug executive director sa CCTO uban sa department head sa CCTO Alma Barandog-Casimero nibutyag nga morekomendar sila kang Labella sa paglibkas sa truck ban.
Kini alang sa mga truck nga nagkarga sa mga basic necessities sama sa bugas, gatas, ug mga ilimnon nga dili makahubog.
Lakip usab niini, ang mga truck nga nagkarga og harina, asukar, asin ug mga sagol sa pagkaon, mga prutas, utanon, karne ug isda.
Matud ni Gealon nga ilahang gitan-aw usab ang pag-exempt sa mga truck nga nagdala og medical supplies ug equipments, PPEs, facemask ug medisina nga kinahanglan sa pakigbatok sa covid-19.
Dugang ni Gealon nga maoy tinguha ni Labella nga ang pagkaon ug medical supplies anaa sa mga tindahan ug grocery stores tibuok dakbayan aron dali ra kining mapalit sa mga tawo. /BDB (BANATNEWS)
- Latest