Curfew, social distancing daghang malapason

CEBU, Philippines — Miabot sa 43 ka tawo ang nadakpan sa curfew sa Dakbayan sa Talisay nuot sa gipatumang paghigpit sa gobiyerno aron maputol ang pagtakod sa novel coronavirus(COVID19).

Ang kapulisan inubanan sa taga City of Talisay-Traffic Operation Development Autjority (CT-TODA) nipahigayon sa curfew.

Si Police Major Gerard Ace Pelare, pangu sa Talisay City Police Station nibutyag nga ilang gituman ang kamanduan nj Gobernador Gwendolyn Garcia aron kalikayan ang pagkatakap sa virus.

Gilangkoban ang dinakpan og 29 ka menor de edad, duha ka senior citizen ug 12 ka ginikanan ang nadala sa buhatan sa kapulisan.

Ang mga dinakpan gi-blotter ug pasakaan og kaso base sa resolusyon 778-2020.  Matud pa ni Pelare nga padayon ang ilang pagsuroy sa kadalanan aron masiguro nga ang katawhan nituman sa kamanduan sa gobernador.         

Social distancing

Bisan sa higpit nga pahimangno bahin sa social distancing, duna gihapoy mga drayber ang milighot ug nangadakpan hinuon sa  mga sakop  sa Traffic Enforcement  Agency of Mandaue (Team).

Si Atty. Ernesto Maringuran, pangulo sa Team miingon nga ang mga gidakop wala mosunod sa one-seat-policy nga gimando. Tumong niini nga dili maluwas ang mga pasahero kun pananglit dunay usa ka pasahero ang nataptan na og COVID-19.

 Ang madakpan  ug maisyuhan og citation ticket makabayad og multa  nga P500 ngadto sa P1,000  sa kalapasan nga nahimo niini.

Subli sab niyang gipahinumdom ang “no-backride policy” bisan pamilya ang angkas sa mga motorsiklo kun moagi sa Dakbayan  sa Mandaue. Romeo T. Limpangog/IBM (BANATNEWS)