Gwen mobisita sa mga barangay
CEBU, Philippines — Angay nga maseguro gyud sa mga kapitan sa mga barangay sa tibuok lalawigan nga mapatuman nila ang mga kamanduan kalabot sa pagpatuman sa social distancing ug movement control.
Kini gumikan kay usa sa mga adlaw kkalit lang nga motunga si Gob. Gwendolyn Garcia sa barangay aron pagsuta kun nasunod ba ang iyang kamanduan.
“Just prior warning mga barangays, I will just pay a surprise visit,” pahimangno ni Garcia sa mga kapitan.
Ang gobernador nagkanayon nga nisalig siya sa mga opisyal sa barangay nga maoy mangunay pagpatuman sa iyang kamanduan aron paglikay nga mokatap ang coronavirus disease.
Sa iyang Executive Order 5-K apil sa gidili sa gobernador ang pagpahigayon og mga duwa sama sa basketball ug uban pang sports activities.
“Kun mahimo tangtangon na na og basketball ring kana inyong mga basketbolan aron di na gyud matintal og duwa pa,” matud ni Garcia.
Alang sa mga niklaro kalabot sa curfew kun maapil ba ang mga out-of-school youth, si Garcia nagkanayon nga mas adunay rason nga kadtong mga wala mag-eskwela magpuyo lang sa ilang mga panimalay kung wala silay trabaho.
“Na di samot, kun wala silay mga trabaho, wala silay ikapakita nga ID, unsa man ilang ipakita kung sitahon sila so ayaw na lang og gawas,” matud ni Garcia. /GMR (BANATNEWS)
- Latest
