Pagtuyok sa Jubilee Cross ug imahen sa Senyor Sto. Niño gipahunong

CEBU, Philippines — Gikanselar ang Journey of 2021 Jubilee Cross and Pilgrim Image of Senior Santo Niño de Cebu subay sa mando ni Cebu Archbishop Jose Palma apil na ang tanang mga kalihukan sa simbahan ilabi na kadtong adunay panagtapok sa daghang tawo aron sa paglikay sa coronavirus (COVID19).

Ang Jubilee Cross ug imahen sa Sr. Santo Niño nituyok sa mga parokya sa Archdiocese of Cebu subay sa kalihukan sa 500 years sa Kristiyanismo sa nasud sa umaabot nga tuig 2021.

Ang maong Jubilee Cross ug Balaang Bata motuyok sa 500 ka mga simbahan diin giuna dinhi sa Sugbo una kini molibot sa tibuok Pilipinas una kini mobalik sa Archdiocese of Cebu sunod tuig.

Apan tungod sa hulga sa COVID19 gihunong una ang maong kalihukan ug wala pa masayri kung kanus-a na usab kini padayunon.

Ang team nga nagdumala sa Journey sa Cross and Pilgrim Image sa Sr. Santo Niño gilangkuban sa mga sakop sa Commission on Youth.  /IBM (BANATNEWS)