Dumos Teofilo gisirad-an, mga madre nag-ampo batok COVID-19

CEBU, Philippines — Dili una paduawan sa mga tumutuo ang Dumos Teofilo human sa pagpahibalo ni Archbishop Jose Palma nga kanselado usa ang tanang mga Santos Misa ug kalihukan sa simbahan tungod sa hulga sa Corona Virus Disease 2019.

Kini ang gitug-an ni Mother Superior Louella Grace Buscato of the Daughters of Sta. Teresa nga nahinabi sa Banat News.

Matud pa ni Buscato, niadtong Marso 18, Miyerkules gipahibalo na nila ang pagsira na sa Domus Teofilo tungod sa hulga sa COVID 19, apan tungod kay aduna pa may niabot nga uwahing bisita ilaha ra kini gidawat basta mosunod sa protocol aron malikay sa maong hulga gikan sa maong sakit.

Sumala pa ni Buscato, sukad niadtong Marso 19, 2020 hangtod karon sirado gayud ang mga gate sa ilang mother house sa DST ug nagpahigayon usab sila og social distancing sa mga kamadrehan bisan sa ilang pagpangaon  nidistansya ang usa’g-usa.

Dugang pa ni Buscato, bisan sirado ang Dumos Teofilo, padayon gihapon ang ilang pag-ampo mga kamadrehan sulod sa mother house lakip usab ang pagpahigayon nila og Aurora sud sa duha ka hektaryang luna, dala ang mga nagkadaiyang imahe uban ang mga nagkadaiyang intensyon lakip usab ang hingpit nga pagtapos na sa sakit nga COVID19.

Gitug-an ni Buscato, wala pa sila masayod kung kanus-a nila buksan pagbalik ang Domus Teofilo, ug anha na siguro kung wala na ang hulga sa maong sakit nga COVID. /IBM (BANATNEWS)