Libreng sakay, drayber di paabangon
CEBU, Philippines — Nikabat sa 700 ka tawo ang nakabenepisyo sa libreng sakay nga gitanyag sa Dakbayan sa Talisay sugod niadtong Huwebes sa hapon.
Matud ni Jonathan Tumulak, traffic czar sa siyudad, ila gyud gipatuman ang social distancing tumong sa paglikay sa Coronavirus Disease. Una niini ang kagamhanan pinaagi ni Mayor Gerald Anthony “Samsam” Gullas Jr. nitanyag sa libreng sakay aron dali nga makauli sa ilang pinuy-anan ang katawhan.
Duha ka bus ug pito ka L300 van nga iya sa siyudad ang gigamit sa pagpasakay sa katawhan.
Sa hapon gipatuman ang libreng sakay gumikan kay daghang jeep ang mamasahero sa adlawan.
Ang rota manukad sa ilawom sa flyover sa Tabunok padulong sa Colon, Siyudad sa Sugbo; Fuente Osmeña Rotunda ug Plaza Independencia agi sa South Road Properties (SRP).
Di paabangon
Samtang usa ka operator sa mga pangpublikong sakyanan sa Dakbayan sa Sugbo ang nihatag sab og usa ka adlaw nga libreng abang sa iyang mga drayber basta ulian lang ang gasolina nga nagamit niini sa maong sakyanan.
Gipahibawo ni Kapitan Clifford Jude Ninal sa Barangay San Nicolas Proper ug operator sa Niñal Trans sayo sa buntag kagahapon ang iyang mga drayber nga mobiyahe lang sila ug dili kini niya paabangon isip tabang sa problema sa COVID-19.
Matud ni Niñal kinsa adunay pito ka yunit nga iyang gihangyo ang iyang mga kaliwat ug igsoon nga dili lang paabangon ang mga drayber sulod sa usa ka adlaw isip tabang nila samtang nanawagan sa uban operators sa pagtabang sa mga drayber.
Papilion sab ni Niñal ang mga drayber kung unsang adlawa dili sila moabang aron pagseguro nga dunay madala sa ilang pamilya. Rowena D. Capistrano/GMR (BANATNEWS)
- Latest