Social distancing wa tumana

CEBU, Philippines — Dili mominos 40 ka mga Public Utility Jeepneys lakip ang duha ka vans ang gipadad-an og Inspection Summon Report human sa ilang kalapasan sa wala pagtuman sa kamanduan sa Land Transportation Franchising and Regulatory Board may kalabutan sa social distancing nga gipatuman sulod sa Metro Cebu aron sa paglikay pagkatap sa novel coronavirus (COVID-19).

Kini ang gitug-an ni LTFRB 7 Regional Director Eduardo Montealto Jr, nga nahinabi sa mga tigbalita.

Matud pa ni Montealto, adunay mga drayber nga gahi gihapon og ulo nga wala motuman sa protokol apil na niini ang mga wala magsuot og facemask ug nagpasakay og daghang pasahero.

Subay sa gipatumang quarantine, kinahanglang dunay bakante sa isi’g ka kilid sa pasahero. Kun tag napulo ka pasahero sa lingkuranan, kinahanglang taglima nalang.

Ang COVID-19 giingong mapasa pinaagi sa droplets o pinisik sa laway sa tawo mao nga importante gyud ang distansya nga usa ka metro.

Sumala pa ni Montealto, kadtong mga napadalhan ug IRS, kinahanglang mopasabot nganong dili sila angay pahamtangan ug silot sa ilang mga nahimo nga kalapasan.

Gitug-an ni Montealto, ang unang kalapasan sa driver sa dili pagtuman sa Social Distancing makamulta sila og P5 mil sa 1st offense, P10 mil sa 2nd offense ug pataas.

Hinuon gikalipay gihapon ni Montealto bisan adunay mga 40 ka badlungong mga drayber, aduna man gihapoy  8 mil ka mga driver nga nagpabiling nituman sa maong kamanduan.

Giawhag ni Montealto ang mga operators ug drivers nga sundon lang gayud ang ilang kamanduan aron dili sila mag-atubang og multa.

Samtang sa mga pasahero dili nalang pugson sa pagsakay kung nakita nilang puno na ang mga sakyanan aron dili usab makamulta ang mga driver.

Libreang sakay

Tungod sa mga nadawat nga reklamo sa mga Talisaynon nga naglisod na sa pagsakay  tungod sa gipatumang quarantines ug curfew si Talisay City Mayor Gerald Anthony “Samsam” Gullas mipatuman og libreng sakay para sa mga konstituwente nga dunay katuyoan sa Cebu City.

Si Jonathan Tumulak, traffic head sa siyudad miingon nga gisugdan nila kagahapon sa hapon ang libreng sakay. Ang mga rota mogikan sa ilawom sa flyover sa Tabunok padung sa dalan Colon n subay sa Natalio Bacalso Avenue.

Samtang ang ikaduha nga rota diha gihapon manukad sa ilawom sa flyover sa Tabunok hangtud sa Fuente Osmeña.  Ang ikatulo nga rota gikan sa ilawom sa flyover sa Tabunok hangtud sa Plaza Independencia nga moagi sa South Road Properties (SRP).

Magsugod kini sa alas-6 sa buntag hangtud sa alas- 8 sa buntag ug mobalik sa alas 4 sa hapon hangtud sa alas 6 sa gabii. Ang mga sakyanan nga gamiton iya sa Syudad sa Talisay ug pipila ka sakyanan gikan sa matag barangay.

Nagkanayon si Tumulak nga ipatuman sa maong mga sakyanan ang social distancing subay sa protokol nga gimando sa quarantine. Gabriel Bonjoc/IBM (BANATNEWS)