COVID-19 free ang Cebu

CEBU, Philippines — Nagpabilin nga coronavirus disease (Covid-19) free ang Sugbo, sumala sa Department of Health Central Visayas.

Si Dr. Jaime Bernadas ang regional director sa DOH-7 nagkanayon nga nag negatibo sa COVID-19 ang 16 ka specimen nga ilang gipadala didto sa Research Institute for Tropical Medicine (RITM) samtang aduna pay tulo nga ilang gihulat ang resulta. Samtang aduna pay laing hugna sa specimens nga ilang ipadala didto.

Ang DOH nagkanayon nga adunay 45 ka bag-ong kaso sa COVID-19 sa Pilipinas, o 187 na tanan ang kaso.

Sa pagsulat niining balita,sumala ni Bernadas wala pa silay nadawat nga report nga adunay tagag Sugbo sa 45 ka kaso nga bag-ong nakompirmar.

Sa pagkakaron, adunay 75 ka Influenza-like Illnesses (kanhi gitawag nga PUIs) ug 726 ka Persons Under Monitoring.

Sa PUMs,164 ang naa sa Bohol,31 ang sa Probinsya sa Sugbo; 391 sa Negros Oriental; 4 sa Siquijor;40 sa Cebu City; 41 sa Lapu-Lapu ug 36 sa Mandaue. Ang maong PUMs kasamtangang gipaubos sa home quarantine.

Samtang adunay 19 sa Probinsya sa Sugbo nga naa sa quarantine facility.

Matud ni Bernadas nga adunay usab 150 nga PUIs ang na discharge na sa tambalanan.

Si Cebu City Health Officer Dr. Daisy Villa miingon nga sukad niadtong Marso 10 hantod sa petsa 13 sa maong buwan nakapadala na sila og 65 ka specimens sa mga Person Under Investigation ngadto sa RITM.

Sa 65 ka specimens nga nga gipadala sa RITM napulo niini ang nigawas na ang resulta kagahapon, negatibo silang tanano ug ang 55 nga nabilin pending pa ang resulta.

Kadtong 27-anyos nga namatay nga taga Cebu City kinsa gi-cremate dayon human makuhaan og swab gipaabot pa ang resulta niini. Apan una ng gibutyag ni Villa nga duna kini meningitis.

Gipahibalo sab niya nga naka -order na ang siyudad og 10 mil ka test kits  ug motabang ang Office of the Presidential Assistant for the Visayas sa pagpalit niii didto sa South Korea. Decemay P. Padilla/IBM (BANATNEWS)