Bawal ang magsikit sud sa pasaheroan

CEBU, Philippines — Kadagkuan sa Land Transportation Office ug Land Transportation Franchising and Regulatory Board, niawhag sa mga operators ug drivers nga sundon ang kamanduan bahin sa social distancing nunot sa gipatumang pamaagi pagpahinay sa tinakdanay sa sakit nga novel coronavirus (COVID-19).

Sila si Director Victor Caindec sa LTO-7 ug Regional Director Eduardo Montealto Jr sa LTFRB-7 nga nahinabi sa Banat News mipasabot nga igo ra silang nipatuman sa kamandoan gikan sa kaulohan.

Gitug-an ni Caindec sa pagkakaron ang pagpahibalo lang usa sa mga angay ug dili angay buhaton ngadto sa mga drayber sa mga public utility jeepneys ang ilang mahimo. Human niini, dakpon og isyuhan og tiket ang magmagahi.

Si Montealto sa iyang bahin nitug-an nga kinahanglang mosabot ang tanan ug motabang sa gibuhat sa gobiyerno kay para kini sa kaayohan sa tanan.

Giawhag ni Montealto ang tanan nga mosunod sa direktiba para sa kaayohan sa tanan sama sa social distancing, pagsul-ob ug mask, hand washing, sanitizing ug uban pa.

Susamang direktiba usab ang gipatuman karon sa nagkadaiyang mga siyudad sama sa Talisay City ug Mandaue City pinaagi sa pagpahimangno sa mga pasaheroan nga dili magsikit ilang mga pasahero. Gabriel Bonjoc, Romeo Limpangog/IBM (BANATNEWS)