Chan nimando sa mga kawani pag-sanitize

CEBU, Philippines — Higpit na nga gimando ni  Mayor Junard Ahong Chan sa mga department head ug mga kawani  sa kagamhanan  sa  Dakbayan  sa Lapu-Lapu sa pag-sanitize sa ilang mga buhatan ug mohimo  usab og thermal gunning sa tanan nga mosulod ug pagtaho dayon kon adunay katahapan  nga nagbaton og coronavirus disease  sa ilang komunidad.   

Giluwatan usab ni  Chan ang susamang proactive nga kamandoan ngadto  sa mga pribadong patigayon ug commercial   companies isip precautionary measures alang  sa pagpugong sa pagkuyanap sa covid-19.

Gitataw ni Chan nga walay nataptan og virus sa  dakbayan taliwala sa komiprmadong taho nga adunay 52  ka kaso  dinhi  sa nasud  apan  atoa kini sa Metro Manila.

Sa  gipatawag nga tigom ni Chan sa mga sakop  sa Lapu-Lapu City Covid Incident Management Team maoy  iyang giluwatan  ang memorandum order 2020-040   o “Precautionary measures  batok  sa pagkuyanap sa covid-19 virus.”

Sa mao niyang kamandoan iyang giawhag ang department heads ug mga kawani  sa nagkadaiyang sa kagamhanan   sa dakbayan  sa   pag-sanitize  sa ilang tagsa-tagsa ka mga buhatan  sa paglikay  sa covid-19 ug gamiton ang thermal scanning sa  mga tawo nga mosulod  sa ilang buhatan.

Nunot niini, temporaryo usab  nga  gipasuspenso ni Chan  ngadto  sa  mga kawani  sa kagamhanan  sa maong dakbayan  sa paggamit  sa  biometric time recording ug gipatuman  usab niya ang curfew  hour nga magsugod sa alas 10:00 sa gabii  hangtud  sa alas 5:00 sa buntag. /BDB (BANATNEWS)