Mga pantalan sa Sugbo pangsirad-an

CEBU, Philippines — Mas gipalapdan pa sa probinsya sa Sugbo paghigpit pagpasulod og mga pasahero gikan sa lagyong mga lugar agi og panagana batok sa pagkatap sa novel coronavirus (COVID19), ang nadugang mao ang mga magagikan sa Negros Island.

Ang maong kamandoan nga nagsugod kagahapong adlawa gipagawas ni Gob. Gwendolyn Garcia tungod sa kamatayon sa 62 anyos nga konsehal sa Negros Oriental nga positibo sa COVID-19.

Ang mga pasaherong nakabiyahe na dihang gipagawas ang kamandoan ipaubos sa 14 ka adlaw mandatory quarantine.

Una nang niluwat og kamandoan ang gobernador alang sa pagpatuman og restriction of entry o pagpasulod og mga pasahero gikan sa ubang bahin sa nasod.

Sa iyang Executive Order No. 5-E nga giluwatan Marso 14, dili pasudlon sa Sugbo ang mga pasaherong gikan sa Dumaguete City lakip ang gikan sa Clark International Airport, Legazpi City ug Cagayan de Oro City.

Karong adlawa, sirad-an na sab ang mga pantalan apil na sa Samboan ug Santander.

Sa Martes, Marso 17, ang mga pasahero gikan sa tanang domestic airports sa nasod dili na sab makasulod sa Sugbo sirad-an na sab ang pantalan sa Toledo, Tuburan, Tabuelan ug Tangil sa Dumanjug.Ug sa Marso 18 sirad-an na ang tanang pantalan sa tibuok probinsya para sa mga pasahero.

 “There is a necessity to support efforts of Metro Manila in order to further suppress the spread of covid-19,” pagbasa sa EO ni Garcia.

Gidili na sab ang operasyon sa mga buwangan, mga videokehan, disco bars o uban pang lugar nga makapatapok sa mga tawo. – Le Phyllis F. Antojado/IBM

Brgy. Kapitan nalatayan patay

Patay ang 72-anyos nga barangay kapitan human nalatayan og trailer truck diha sa National Highway sa Barangay Pakigne, lungsod sa Minglanilla niadtong Sabado sa gabii.

Ang biktima mao si Wifredo Cañedo Deiparene, 72, kapitan sa Barangay Linao-Lipata sa maong lungsod. Samtang ang drayber nga nagmaneho sa tralier mao si Wilfredo Daclitan Stella, 55, taga South Granada, Boljoon.

Sa inisyal nga imbestigasyon nila ni PMSgt Oliver Ortega ug PCpl. Ferrante Ygot nga gikan sa habagatan ang trailer paingon sa Siyudad sa Sugbo. Samtang ang biktima nagmaneho sa iyang bisikleta.

Nilabang ang biktima apan wa kini mabantayi sa drayber sa trailer hinungdan nga nalatayan kini.

Napasok si Deiparine sa ligid sa trailer ug patay na pagabot sa South General Hospital. Ang drayber sa trailer gikostudiya na sa kapulisan aron pasakaan og kaso. /IBM (BANATNEWS)