Mga konsehal luwas na sa COVID

CEBU, Philippines — Gideklarar sa Philippine Councilors League Cebu Province Chapter nga luwas na ang tanang konsehal sa lalawigan nga nanambong sa PCL National Convention sa Manila gikan sa coronavirus disease (COVID-19).

Ang pangulo sa PCL Cebu, Konsehal Francis Edward Salimbangon sa Tabogon, nihimo sa maong deklarasyon niadtong Biyernes sa gabii human nilapas na ang 14 ka adlaw sukad sa Pebrero 28 human sa kalihukan nga gitambongan sa mokabat 14,000 ka konsehal tibuok nasud.

Sumala pa sa Centers for Disease Control and Prevention (CDC), ang tawo nga natakdan og COVID-19 makasinati og hilanat, ubo ug paglisud sa ginhawa sulod sa duha ngadto sa 14 ka adlaw.

Health kits

Matud ni Salimbangon nga sa wala pa sila nanglarga gipangaporan nila ang tanang konsehal og mga health kits nga dunay sulod mga bitamina, face mask, alcohol ug ubang personal protective equipment.

Ang pamahayag ni Salimbangon gisuportahan sa iyang bise presidente nga si Konsehal Ricardo “Kuya Nick” Pepito sa Dakbayan sa Toledo.

“I would like to address the public and categorically state that the Cebu Province councilors especially the Toledo City councilors are safe and have not been infected with the COVID-19 virus,” matud ni Pepito.

Matud ni Salimbangon nga ilang gi-monitor ang kaubanan human usa ka konsehal sa Tayasan, Negros Oriental nga nitambong sa kalihukan ang positibo sa COVID-19.

Apan ang maong konsehal giingong nipuyo pa sa iyang paryente sa Greenhills, San Juan human sa kalihukan sa PCL.

“So, again I would like to assure the public that as of this moment all of the Cebu Province councilors are safe and just in case naa jud gipamati ato mga kaigsoonan please coordinate with the nearest medical facility and DOH. Let us help each other, especially in this difficult time,” matud ni Salimbangon.

Si Pepito nanawagan sab sa publiko nga padayong mabinantayon nga malikayan ang pagsulod ug pagpanakod sa virus sa Sugbo.

Full allert

Sa ilang bahin gisaka na sa full alert status ang Police Regional Office 7 aron pagtabang sa mga lokal nga kagamhanan ug sa Department of Health batok sa COVID-19.

Gimanduan ni PRO-7 Director Albert Ferro ang tanang kapolisan sa Central Visayas sa hugot nga pagpatuman og mga precautionary measures sama sa “no mask, no entry” sa kampo ug police stations.

Giistrikto na sab sa Armed Forces of the Philippines Central Command ang pagpasulod ug paggawas sa kampo sa mga sundawo ug mga sibilyan pinaagi sa thermal scanner ug pagbutang og disinfectants.

Giawhag ni Captain Eduardo Prescioso Jr., tigpamaba sa CentCom, ang publiko nga mosulod sa kampo nga kinahanglan nga mosunod sa mga precautionary guidelines aron malikay sa sakit.

Gipasalig sa kapolisan ug kasundaluhan nga magpabilin nga luwas sila ug andam nga motabang sa publiko. Sheriza Mae R. Uy/GMR (BANATNEWS)