500 ka drayber sa traysikol gitigom; Schedule sa truck ban han-ayon

CEBU, Philippines — Kapin sa 500 ka drayber sa traysikol sa Lungsod sa Minglanilla ang gitigom aron ipahibawo kanila ang kamandoan sa Department of Interior and Local Government (DILG) sa pagdili na nila sa pagbiyahe diha sa nasudnong karsada.

Si Concordio Mejias, municipal administrator sa maong lungsod, Jean Romarate, DILG sa Minglanilla ug ang kapolisan nakigtagbo sa mga drayber aron ipasabot ang kamandoan.

Matud ni Mejias nga igo lang sila nga mopatuman sa kamandoan sa DILG.

Atol sa maong tigom nasabotan nga ang mga drayber ang mohimo og route plan nga isumiter ngadto sa DILG ug dayon himoan kini og ordinansa sa konseho.

Nipadayag ang pipila ka mga drayber ngadto sa opisyales sa ilang sentimento nga ang pagpamasada og traysikol maoy ilang panginabuhian nga gisaligan sa ilang pamilya.

Ang mga drayber gihatagan kini og panahon hangtud sa sunod semana nga makapresentar sa ilang route plan.

Sa pagkakaron padayon ang pagpamasahero sa mga traysikol nga adunay prangkisa.

Ang lungsod mogama og operasyon batok sa mga traysikol nga walay mga dokumento.

Sa laing bahin, buot ni Gobernador Gwendolyn Garcia nga mahan-ay ang schedule sa truck ban sa mga lungsod ug dakbayan ilabi na sa Metro Cebu area.

Kini human nasayran nga lainlain ang schedule sa truck ban sa mga lungsod ug dakbayan sama sa Dabkayan sa Sugbo ug Mandaue.

Gikatakdang sa sunod semana makigtigom si Garcia sa mga mayor aron ipresentar ang traffic management plan nga nahimo sa Cebu Provincial Traffic Management Board.

Si Garcia nagkanayon nga ang traffic management board nipasar kini og resolution alang sa pagdeklara og jurisdiction sa tanang national roads sa Probinsiya sa Sugbo aron nga mahan-ay ug ma-synchronized ang pagsulbad sa trapiko sa tibuok lalawigan. Le Phyllis F. Antojado/BDB (BANATNEWS)