Pribadong water supplier giawhag motabang sa MCWD
CEBU, Philippines — Si Konsehal Dave Tumulak kinsa mao usab ang pangulo sa Cebu City Disaster Risk Reduction Management niawhag karon sa mga pribadong supplier og tubig nga motabang sa Metropolitan Cebu Water District.
Kini gumikan sa pagkatap karon sa corona virus disease (COVID)-19.
Matud ni Tumulak nga kanunay nga gipahimangno ngadto sa katawhan nga manghugas sa ilang mga kamot kanunay ug proper hygiene nga nagkinahanglan og tubig hinungdan nga importante kaayo ang supply sa tubig.
Ang dakbayan sa Sugbo nagproblema kini sa tubig sulod sa pipila na ka higayon human sa kapakyas sa MCWD sa pagtubag sa panginahanglanon sa konsumedor.
Ug aron sa pagpugong sa pagkuyanap sa maong sakit niawhag sila sa mga private water supplier sa pagsuporta sa MCWD sa pag-deliver og tubig sa publiko.
Si Tumulak nagkanayon nga ang pag-apod-apod sa mga private water suppliers ug tubig ngadto sa publiko kabahin kini sa ilang corporate social responsibility ug tabang nila sa pakigbatok sa pagkatap sa covid-19.
Ang resolusyon ni Tumulak iduso ngadto sa buhatan ni Mayor Edgardo Labella, Department of Health, MCWD ug mga private water supplier sa Sugbo alang sa ilang kasayoran ug tukma nga aksiyon. /BDB (BANATNEWS)
- Latest