Paghawan sa sidewalk gihingusgan sa Mandaue
CEBU, Philippines — Gihingusgan karon sa kagamhanan sa Dakbayan sa Mandaue ang ilang road clearing operation isip pagsanong sa kamandoan sa Department of Interior and Local Government.
Si Edwin Jumao-as, pangulo sa City Legal Enforcement Unit sa Dakbayan sa Mandaue nagkanayon nga 65 porsyento na ang ilang nahawan nga kadalanan sa 27 ka barangay.
Lakip sa ilang nahawan mao ang 917 ka mga ilegal parking sukad niadtong Pebrero 16, 2020.
Giangkon ni Jumao-as nga adunay pipila ka mga barangay sa dakbayan nga ilang namatikdan nga hinay ang gihimo nga clearing operation ilabi na sa mga nakaali nga kongreto nga mga estraktura.
Adunay 151 ka ilegal nga estraktura sa mga sidewalk ug 79 na niini ang ilang hingpit nga napahawan ug ilang gilauman nga daghan pa ang ilang mahawanan.
Matud ni Jumao-as nga adunay mga dalan nga ang ilang mga sidewalk ang gihimong pundohanan sa mga construction material ug ang mga tag-iya niini ilang gihatagan og kahigayonan sa paghawan sa maong lugar.
Gibutyag ni Jumao-as nga adunay pipila ka mga barangay sa dakbayan nga nagpadayon ang ilang pag-ayuda sa paghawan sa mga sidewalk niini.
Si Jumao-as nipahibalo sa mga molupyo sa kabarangayan ka labot sa kausaban sa ordinansa nga nagpausbaw sa multa gikan sa P500 ngadto na P3,000 alang sa unang kalapasan ug ikaduhang kalapasan sa Ordinansa gikan sa P1,000 nga multa ngadto sa P5,000 ug pagsakmit sa mga baligya o mga butang nga gipahimutang diha daplin sa karsada. /BDB (BANATNEWS)
- Latest