Kahoy, lubi putlon sa road clearing

CEBU, Philippines — Dili mominus sa 120 ka punoan sa kahoy ug lubi ang maapektahan unya sa road clearing nga ipahigayon sa Barangay Cambigong, Lungsod sa Samboan. Kini subay sa kamanduan sa Department of Interior and Local Government ngadto sa kabarangayan sulod sa 75 ka adlaw.

Matud ni Konsehal Emerito Luague nga sa pagkakaron wala pa nila hingpit napatuman ang kamanduan tungod kay nagpahigayon pa sila og tigum sa mga apektadong nanag-iya sa kahoy ug lubi nga maagian sa clearing operation.

Sumala pa ni Luague nga nihimo sila una og ocular inspection sa mga maapektahan diin kasagaran niini mga lubi ug kahoy samtang wala kaayoy kabalayan.

Dugang ni Luague nga ilang hangyoon ang dili mominus 50 ka pamilya nga apektado sa clearing nga mosabot sa ilang buhaton kay kamanduan man kini sa gobiyerno ug sila man usab ang mag-atubang og silot kung dili mopatuman sa kamanduan.

Gitug-an ni Luague nga kung mahuman na ang ilang pagtuki tali sa mga apektado sa clearing, subsob na dayon nilang ipahigayon ang kamanduan sa DILG. – Rowena D. Capistrano/GMR

DILG mohatag og P125M sa probinsiya

Gipaabot nga makadawat ang Probinsiya sa Sugbo og P125 milyones nga pondo gikan sa Department of Interior and Local Government (DILG) alang sa rehabilitasyon sa mga provincial roads.

Kini subay sa Conditional Matching Grand to Provinces (CMGP) sa DILG ug Department of Budget and Management (DBM).

Si Bernadette Camilo, coordinator sa CMGP, nakigtagbo kang Gobernador Gwendolyn Garcia niadtong Marso 3.

Gipasabot nga ang Probinsiya sa Sugbo adunay counterpart diin P100 mil ang matag kilometro alang sa maintenance sa maong mga dalan nga ayuhon.

Ang Probinsiya sa Sugbo adunay 315 kilometros nga provincial roads nga ayuhon diin kinahanglan og P31.5 milyones nga pondo alang sa maintenance. /GMR (BANATNEWS)