217 ka enforcers sa CTMS gi-drug test

CEBU, Philippines — Gipaubos sa random drug test ang 217 ka traffic enforcer  sa City Traffic  Management  System  (CTMS)  sa Dakbayan sa Lapu-Lapu diin gitigom kini diha sulod sa complex sa siyudad.

Si Mayor Junard Ahong Chan ang nimando sa kinalit nga drug  test  sa maong mga traffic enforcer tungod sa iyang kasagmuyo human nga ang  usa sa mga sakop sa CTMS nga nalambigit  sa ilegal nga drugas ang lakip sa nadakpan sa kampaniya batok sa ginadiling drugas. Nasayran nga sa maong pagpatawag og kinalit nga tigom upat ka traffic enforcer ang  napakyas  sa pagtambong.

Ang maong mga enforcer inig balik niini sa trabaho ipaubos gihapon sila sa drug test ug pasumitihon usab kini og eksplinasyon sa ilang pagpalta sa trabaho.

Si Chan sa iyang pamahayag subli kining nipahimangno ngadto sa mga enforcer  nga mawagtangan kini og trabaho ug posibleng mapriso usab kini kong dili mohunong sa ilang paglambigit sa ginadiling drugas.

Matud ni Chan nga iyang nasayran nga adunay 22 ka traffic enforcer sa CTMS ang nalambigit  sa paggamit ug pagmapaligya og ilegal nga drugas. “Honest-say ta, tug-an nalang mo sa tinuod kamong mga naggamit pa og illegal drugs, resign na lang daan kay di gyud ta mosugot nga dunay durugistang empleyado sa gobiyerno”, awhag ni Chan.

Ang executive director sa City of Lapu-Lapu for Substance Abuse Prevention (CLOSAP) Garry Lao nagkanayon nga ang iyang  buhatan kasamtangan  pa nga mo- evaluate sa initial results  sa  gipahigayon nga drug test. /BDB (BANATNEWS)