MILO di ipamugos sa mga kapitan

CEBU, Philippines – Walay mahimo si Cebu City Mayor Edgardo Labella kung adunay mga kapitan nga dili modawat sa iyang hangyo sa pagbutang og Mayor’s Information Liaison Officers sa kabarangayan.

Matud ni Labella nga ang mga MILO nga ipahimutang diha sa kabarangayan motabang kini sa mga kapitan sa pagdala sa mga panginahanglanon sa barangay ngadto sa kagamhanan sa siyudad.

Sumala pa ni Labella nga kung dili ang kapitan mohatag og luna sa barangay hall alang sa MILO mangita sila og lugar sa barangay gihapon aron himoon nga buhatan para mapadangat ang tanan mga batakang serbisyo gikan sa kagamhanan ngadto sa katawhan.

Gitug-an ni Labella nga mga job order nga empleyado ang modumala sa maong buhatan sa MILO ug gipaneguro nga dili kini sila molabaw sa gahum sa kapitan. Si Labella nitug-an nga ubay-ubay na sab sa mga kapitan ang nihangop sa MILO diin wala silay gipili sa pagpadangat sa mga serbisyo sa katawhan, kaalyado man nila o dili. /GMR (BANAT NEWS)