P10 milyones balay sa ‘druglord’ gi-freeze

CEBU, Philippines — Duha sa pito ka kabtangan sa gidudahang druglord nga si Rustico Ygot ug sa giingong uyab niini nga si Jocelyn Encila sa Lungsod sa Consolacion ang gipaubos sa freeze order kagahapon sa buntag.

Nangulo sa pagpatuman sa freeze order mao ang regional director sa Police Regional Office 7, Police Brigadier General Ignatius Ferro, uban ang mga tinugyanan sa Anti-Money Laundering Council (AMLC) ug Philippine Drug Enforcement Agency.

Ang duha ka kabtangan nga ubos sa freeze order naglakip sa duha ka andana nga balay sa Barangay Casili ug tulo ka andana nga balay sa Barangay Jugan diin gibana-bana nga moabot sa P10 milyones ang balor.

Si Ferro nitug-an nga ang pagpaubos sa mga balay sa freeze order gipatigayon aron dili kini magamit sa ilegal nga kalihukan sama sa bodega sa ginadili nga drugas ilabi na anaa kini sa hilit nga lugar ug mingaw diin dili masayran sa mga silingan ang mga ilegal nga binuhatan tungod kay tag-as ang paril.

Ang kapolisan mosusi pa sa mosunod nga adlaw sa dugang kabtangan ni Ygot ug Encila nga ipaubos sa freeze order.

Gawas sa pito ka kabtangan aduna pay unom ka bank accounts, motorsiklo, alahas ug cash nga dul-an sa P30 mil.

Ang kabtangan ni Ygot ug Encila gawas sa Consolacion anaa pa kini sa ubang bahin sa Probinsiya sa Sugbo.

Daku ang pagtuo ni Ferro nga pinaagi sa pag-freeze sa maong mga kabtangan makahinay kini sa grupo ni Ygot nga posibleng naglihok apan wala pa hinooy report nga nadawat ang kapolisan ug padayon pa kining gi-monitor.

Kung kahinumduman si Ygot nadakpan sa Bohol niadtong 2010 samtang ang uyab niini nga si Encila niadtong Marso 3, 2019 kinsa nakuhaan og dul-an sa P200 milyones nga balor sa ginadili nga drugas

Ang legal officer sa AMLAC, Atty. Rommel Trijo, nitug-an nga taas ang proseso sa pagpagawas sa freeze order hinungdan nga nilanat kini og pipila ka buwan.

Gitug-an ni Trijo nga ang balay sa Casili gipuy-an sa pamilya kanhi ni Encila samtang ang sa Jugan gipuy-an usab kini kanhi sa pamilya ni Ygot.

Ang freeze order adunay warning nga “no trespassing” tungod kay ubos sa balaud adunay silay silot nga atubangon. /GMR (BANATNEWS)