600 balay nasunog, P1.5 milyones danyos sa Suba

CEBU, Philippines – Dul-an sa 600 ka pamilya ang apektado sa sunog sa tulo ka sitio sa Barangay Suba, Dakbayan sa Sugbo niadtong Miyerkules sa gabii.

Base sa inisyal nga talaan sa Department of Social Welfare and Services, adunay 249 ka panimalay ang apektado diin 220 ang hingpit nga naugdaw ug 29 ang nakan-an sa kayo.

Sa talaan adunay 521 ka pamilya ang apektado o 2,454 ka tawo.

Ang sunog nagsugod sa panimalay nila ni Liezel ug Jerry Cabido ug gibana-bana ang danyos sa P1.5 milyones diin walay gikataho nga nakalas o naangol.

Si Liezel nangayo og dispensa sa mga silingan sanglit wala man nila gituyo ang sunog ug aksidente kini.

Matud ni Senior Fire Officer 1 Novo Erana, imbestigador sa maong sunog, nga ilang sutaon ang hinungdan sa sunog ug wala nila gisalikway ang posibilidad nga may kalabutan sa electrical ilabi na giingong adunay nagpiti-piti sa kisame sa panimalay sa wala pa ang sunog.

Bisan pa man og tua sa kaulohan si Cebu City Mayor Edgardo Labella apan nag-monitor kini sa sitwasyon sa Barangay Suba nga naigo sa sunog.

Nimando si  Labella kang City Administrator, Atty. Floro Casas Jr., uban kang City Legal Officer, Atty. Rey Gealon, sa pag-adto sa lugar ingon man personnel sa Cebu City Medical Center aron motan-aw sa mga dunay gihambin sa panglawas.

Mohatag og P20,000 nga ayuda ang siyudad sa mga nanag-iya sa balay nga nasunog samtang P10,000 sa nag-abang.

Tun-an sab sa siyudad kun mopatuman ba og reblocking sa dapit. Decemay P. Padilla/GMR (BANAT NEWS)