Managauyoang HVTs sa Mandaue nadakpan

CEBU, Philippines — Gitanggong sa kapolisan sa Mandaue  City  Police  Office (MCPO) ang manag-uyoang gipasanginlang pushers human sila nadakpan sa buy bust  operation  diha sa Barangay Tawason niadtong Sabado sa hapon.

Si  Police Lieutenant  Colonel  Franco Rudolf Oriol nga maoy hepe  sa City  Drug  Enforcement Unit sa MCPO  miila sa mga dinakpan nga mao sila si Jose Bayon, 43, ug pag-umangkong si Junrey Bayon, 34, pulos  taga Barangay Talamban  sa Dakbayan  sa Sugbo.

Matud  pa ni Oriol ang duha nakuhaan og  ebidensiya nga gibabanang 15  gramo nga shabu  nga nagkantidad og P102 mil  base sa Dangerous Drugs Board (DDB) value.

Gihimo ang operasyon batok sa  uyoan kansang pangalan pirmeng ibutyag sa mga nauna nang nangadakpan sa kapolisan.

Gitataw  ni Oriol nga  ilang nakuha ang napulo  ka gramo nga shabu gikan  sa uyoan nga si Jose  ug lima ka gramo gikan  sa pag-umangkon nga gituohan nilang namaligya sab og ilegal nga drugas.

Ang duha gikonsiderar nila nga pulos High Value Targets sa kampanya batok ilegal nga drugas diha sa siyudad.  IBM (BANATNEWS)