Mandaue prayoridad sa bakuna sa polio

CEBU, Philippines — Gipauna sa Department of Health ang immunization sa mga bata nga edad 5-anyos paubos kinsa wala pa gyud nabakunahi sa anti-polio vaccine.

Kini ang gibutyag ni Dr. Joan Antonette Albito, Medical Officer III sa DOH-7, sa iyang pagpasabot sa defaulter tracking sa selective immunization pinaagi sa pagpangita sa hingtungdang kabataan tungod kay sila ang posibleng paggagikanan sa impeksiyon. Gitutukan nila ang Dakbayan sa Mandaue tungod kay mao man kini ang high risk diin nagpositibo sa poliovirus ang bahin sa Butuanon River.

“We have enough oral polio vaccines and for the IPV katong injectable naay umaabot nga supplies from central office today so walay rason nga di ta makahatag but that’s for Mandaue only kay ang atoang selective immunization sa Mandaue ra man gyud nato gi-focus, for other cities nga na-involve sa 5-kilometer radius ato lang gi-encourage nga strengthen ilang routine immunization naa man na sila’y supplies pud nga OPV and IPV,” matud ni Albito.

Anaa sa 9,128 ka bata ang target alang sa OPV samtang naa sa 17,736 ang sa IPV sa Dakbayan sa Mandaue.

Ang pagpangita sa DOH sa mga defaulters gipaagi sa house-to-house inabagan sa tabang sa mga Barangay Health Workers nga manuktok sa kabalayan kung duna ba’y mga bata nga edad 5-anyos paubos ug susihon sa masterlist kung kompleto sa bakuna o dili.

Sumala pa ni Albito nga dunay uban nga gahi og ulo maong kinahanglan adtuon gyud sa balay.

Pipila sa rason nganong dunay mga ginikanan nga dili gusto magpabakuna sa ilang anak gumikan sa kahadlok ilabi na sa ilang mga nadungog sa social media nga duna kini epekto ug ang uban sab supak sa ilang pagtuo ug uban pa.

Nanawagan ang DOH sa katawhan nga dili angay mabalaka sa polio virus basta imentinar lang ang kalimpyo sa panglawas ug magpakabana. /GMR (BANATNEWS)