Usa ka Pinoy nga gi-quarantine sa Lahug gipapauli na
CEBU, Philippines – Nakauli na kagahapon gikan sa quarantine facility ang usa ka Pinoy human sa 14 ka adlaw nga pagkalaming.
Wala gipaila ni Dr. Christina Giango ang maong Pinoy apan matud pa nga apil kini sa unang batch nga gi-quarantine niadtong Pebrero 5 gikan sa Hong Kong.
Ang maong Pinoy gi-quarantine sa Cebu Provincial Women and Children Development Center sa Lahug, Dakbayan sa Sugbo.
Sa pagkakaron adunay 15 na lang ang gi-quarantine sulod sa pasilidad sa probinsiya diin tulo ang gikan sa Pinamungajan ug giipon sa pasilidad sa Lahug.
Matud ni Giango nga walay nasakit o nagpakita og sintomas sa Coronavirus Disease (CoViD-19) gikan sa mga Persons Under Monitoring (PUM).
Gipaabot nga sa sunod nga mga adlaw anam-anam na nga mopauli sa ilang mga balay ang nahabilin nga PUMs. Matud ni Giango nga ilang bana-bana nga sa Pebrero 29 makauli na tanang 15 nga nahabilin gawas lang kung adunay moabot.
Adunay tulo nga niabot niadtong Martes apan pulos kini gi-home quarantine sa Alcoy, Dakbayan sa Danao ug Consolacion.
Samgang ang hunta probinsiyal niawhag sa mga commercial establishments sa pagbutang og alcohol ug disinfectants sa mga pasilidad isip lakang pagbatok sa CoViD-19. /GMR (BANAT NEWS)
- Latest