Batan-ong nasunog sa Mandaue napalgan na
CEBU, Philippines – Nakit-an na ang 21-anyos nga batan-on nga adunay special needs human sa duha ka adlaw gikan sa pag-ulbo sa sunog sa may Zamora Street, Centro, Mandaue City nga nikalas sa mga apohan niini nga sila si kanhi Judge Gerardo Gestopa Jr. ug asawa nga si Louella.
Matud ni Senior Fire Officer 1 Wendell Villanueva nga nakit-an ang sunog nga lawas sa batan-ong Gerick Gestopa sa pansayan sa ilang panimalay nga nasunog nga nahimutang sa ikaduhang andana kagahapon sa hapon.
Si Gerick giingong gibalik sa mga apohan sa sulod sa balay aron luwason dihang niulbo na ang sunog nga maoy nakaingon sa ilang kamatayon.
Samtang si Senior Fire Officer 2 Edgar Vergara nga maoy Fire Station chief investigator niawhag sa mga tag-iya og luna sa dakbayan nga kung magtukod og panimalay hatagan gyud og agianan sa mga sakyanan.
Matud ni Vergara nga sa duha ka sunog sa Centro ug Barangay Tabok sa maong dakbayan niadtong Lunes susama nga problema ang ilang nasinati sa pagpawong sa kayo ang kalisud sa agianan. Romeo T. Limpangog/GMR (BANAT NEWS)
- Latest