Gidudahang lider sa NPA nanghimakak

CEBU, Philippines – Buot sa kabanay sa managkapuyo nga gidudahang lider sa New People’s Army nga mosang-at og reklamo batok sa mga sakop sa Bohol Provincial Police Office ug Armed Forces of the Philippines Task Force Bohol-Siquior.

Ang kabanay nilang Reynaldo Camacho ug Carmelita Cañeda ang kusganong nihimakak sa pasangil human sila gidakop niadtong Pebrero 8 sa Purok 7, Barangay Tulang, Getafe, Bohol sa kasong murder.

Gibutyag sa maguwang ni Reynaldo nga si Eulalia Camacho Pacanza nga igo ra kining nag-atiman og fishpond sa Bohol isip tinubdan sa ilang inadlaw nga panginahanglan.

Nahibulong nalang sila nga maoy gikuha sa mga sakop sa militar ug gipasanginlan nga terorista.

Gihimakak usab nila ang mga nakuha nga explosive devices atol sa pagronda sa panimalay sa managkapuyo. Samtang gibutyag sa igsuon ni Carmelita nga si Pedro Cañeda nga nagpuyo ang duha sa Sugbo sa tuig 2000 dihang gipasanginlan nga maoy nag-ambush sa mga sundawo sa Sagbayan, Bohol. Matud ni Pedro nga 2012 pa nipuyo ang duha sa Bohol human nagkaproblema ang fishpond ni Reynaldo.

Ang duha andam moduso sa ilang reklamo ngadto sa Commission on Human Rights. /GMR (BANAT NEWS)