LUDABI-Cebu gibanhaw, bag-ong mga opisyal

CEBU, Philippines — Sa tuyo nga mogilaw ug mabatyagan ang presensya sa sanga sa Cebu, ang Lubas sa Dagang Bisaya, Inc. (LUDABI) nagpili og bag-ong mga opisyales niadtong Sabado.

Ang kanhi nasudnong pamuno sa LUDABI nga retiradong heneral nga si Alexander Abadinas ang nagpatigayon sa piniliay diin ang iyang mga sakop gikan sa Lungsod sa Minglanilla ug San Fernando ng nakighiusa sab sa kalihukan.

Ang mga napili mao sila si pamuno (president) Ann Avonnie Garrido, puli-pamuno (vice president) Gregg Rubio, kalihim (secretary) Max Andrino, tigpamahandi (treasurer) Rocelyn Belarma, tigsusipi (auditor) Boy Manlosa, tinugyanan sa pagsibya ug pagpatik (mass media officers) Boy Patalinghug, Nelson Tantano, Rey delos Reyes, Zac Aragon ug Clay Mañanita.

Ang mga sakop sa hunta direktiba (board of directors) mao sila si Dems Abadinas, Francis Alloso, Henry Reyes Jr., Emil Catalan ug Marianne Juezan.

Human sa piniliay, ang mga napiling opisyal nanumpa atubangan sa kanhi pamuno sa LUDABI nga si Presidential Adviser on Legislative Affairs, Kalihim Adelino Sitoy, atol sa selebrasyon sa iyang ika-84 nga sumad sa adlawng natawhan sa Cordova Sports Complex.

Si Garrido nidasig sa mga ginsakopan nga dili lang kutob sa piniliay ug pagpahural nga molihok ang LUDABI ug iyang gipahibawo nga daghang programa ang gihan-ay na sa mosunod duh aka tuig uban sa paggiya sa kasamtangang nasudnong pamuno nga si Manlalaban Leo Zaragosa ug ni Sitoy.    

Ang LUDABI usa ka dili negosyong kapunongan nga natukod kaniadtong 1956 sa mga magsusulat, magsisibya, ug mag-aawit nga Bisaya sa Dakbayan sa Sugbo kansang panlantaw ug tinguha mao ang pagpalambo sa pinulongang Binisayang Sinugboanon ingon man sa arte ug kulturang Bisaya.

Pipila sa mga magsusulat sa Sugbo nagtimbolay og lanubong mga hunahuna ug ang dugokan sa mga diskusyon mao ang pagpadayon sa kawsa nga gisugdan sa “Amahan sa Dilang Bisaya” nga si Vicente Sotto kinsa maoy labing unang nagpublikador sa Binisayang basahon sa Sugbo nga “Ang Suga” nga nagpahiamgo sa kinabag-an ngano nga ang Binisayang pinulongan maoy labing tam-is nga litokon ug mopagimok sa selyula sa kaunoran.

Ang kapunongan wala na kaayo naatiman sukad sa pagtaliwan sa ulahing pamuno nga si kanhi mayor ug bokal Arleigh Sitoy sa tuig 2016. – GMR (BANATNEWS)