Gitabangan og dunggab patay
CEBU, Philippines — Patay ang usa ka 19-anyos nga lalaki ang gitabangan og dunggab sa tulo ka mga tawo alas 11 pasado ang takna atol sa Valentine’s Day sa Sitio Tamiao, Barangay Poblacion, sa Lungsod sa Compostela.
Si Police Captain Vincent Sosobrado hepe sa Compostela Police Station miila sa biktima nga mao si Jose Duran Ursal III, 19, taga Sitio Balibali, Barangay Poblacion sa maong lungsod.
Ang mga suspek giila nga sila Joyprens Cupid Boyota, 26, Mark Ian Solanda Duran, taga Barangay Cabadiangan, Lungsod sa Compostela, Kenneth Garrido Dayon, taga Lungsod sa Carmen.
Matud pa ni Sosobrado ang inahan sa biktima midangop kanila ug mipahibalo nga gidunggab ang anak niini ug patay na pagdala nila sa tambalanan.
Adunay mga testigos ang kapolisan nga nakatumbok sa tulo nga maoy naghimo sa krimen ug sila sab maoy nisumbong kun asa nanagan ang mga mamumuno. Sa gihimong follow-up operation nadakpan ang tulo sa Lungsod sa Carmen.
Si Sosobrado miingon nga personal nga bikil ang motibo sa maong pagpatay sa biktima, apan wala pa masayri kun unsa. /IBM (BANATNEWS)
- Latest