Covid-19 wala makahulga sa mga magtutuo

CEBU, Philippines — Gibana-banang kapin sa 2 mil ka magtutuo sa Archdiocese of Cebu ang nitambong sa gipahigayong “Penitential Walk for Life” batok sa tanang hulga sa kinabuhi diin gipasiugdahan kini sa Commission on the Laity sa Archdiocese of Cebu.

Ang maong kalihukan gisugdan sa usa ka prosisyon diha gikan sa atubangan sa Department of Health sa Osmeña Boulevard kagahapon sa kadlawon ug gitapos sa usa ka Santos nga Misa nga gidumala ni Archbishop Jose Palma.

Ang kalihukan gisibya kini sa DyRF1215 aron makasabat ang mga niapil sa kalihukan.

Si Palma sa homiliya niini niawhag sa mga magtutuo sa padayon nga pag-ampo batok sa tanang hulga sa kinabuhi ilabi na sa 2019 coronavirus disease.

Gidasig usab ni Palma ang mga magtutuo nga ilakip sa pag-ampo ang mga scientist tibuok kalibutan nga mga makakita na sila og sulbad o tambal alang sa kaayohan sa coranavirus.

Giampo usab ni Palma lakip ang mga Overseas Filipino Workers nga apektado sa travel ban tungod sa Covid-19.

Si Reynald Andales, COL- board mapasalamaton tungod kay bisan sa hulga sa coronavirus adunay mga layko nga nibarug aron sa pag-ampo sa tanang mga hulga sa kalibutan sama sa mga sakit ug uban pa. Decemay P. Padilla/BDB (BANATNEWS)