Dul-an katunga ang pag-ubos sa dengue sa CV

CEBU, Philippines — Niubos og 49 porsyento ang kaso sa dengue sa Central Visayas karong tuiga itandi sa niaging tuig.

Base sa datos sa Department of Health 7, nag-una ang Dakbayan sa Sugbo sa may labing daghang kaso sa dengue ug gisundan sa Dakbayan sa Lapu-Lapu ug Mandaue.

Matud ni Dr. Ronald Jarvik Buscato, dengue program coordinator sa DOH-7, nga bisan sa pagkunhod sa kaso dili angay mokompiyansa ang publiko ug ipadayon ang 4S nga mao “search and destroy breeding sites, secure self-protection measures, seek early consultation and support fogging or spraying in hotspot areas.”

Base sa uwahing datos sa DOH-7, moabot sa 1,596 ang kaso sa dengue sa tibuok rehiyon diin upat na ang namatay.

Gipasabot ni Buscato nga gilibkas na ang epidemic sa nilabay nga tuig apan duna lang gihapon sila’y gisunod nga standard monitoring aron dili mabiyaan.

Gisusi sab nila nganong may mga areas nga wala’y kaso kaniadto apan nakitaan karon. –/GMR (BANAT NEWS)