Pusher nilangoy sa sapa, konsehal nakasibat sa tigbakay

CEBU, Philippines —  Nisuway unta sa pagsibat nga pusher og shabu atol sa buy-bust operation sa kapolisan sa Presinto 1 sa Mandaue City Police Office (MCPO) pinaagi sa pag-ambak sa Butuanon River, Paknaan, Dakbayan sa Mandaue niadtong Domingo sa hapon.

Apan ang suspek nga si Rodrigo Camangyan, 35, taga Sitio Pulangbukid, Alang-Alang sa maong dakbayan, ang wala gihapon kaugpo kay nadakpan sa nigukod nga mga polis. Matud ni Police Major Ramil Morpos, hepe sa Presinto 1 sa MCPO, nga nasakmit gikan kang Camangyan ang 12 ka gagmay nga pakete sa shabu nga nagkantidad og P2,4500.

Samtang mokabat sa P700,000 nga kantidad sa shabu ang nasakmit sa kapolisan sa Presinto 5 sa MCPO atol sa buy-bust operation sa Paknaan sa maong dakbayan alas 10 pasado sa buntag niadtong Domingo.

Si Police Major Aldrin Villacampa, hepe sa Presinto 5 sa MCPO, niila sa tulo ka nadakpan nga sila si Freddie Puesca, 42, taga Barrio Luz, Dakbayan sa Sugbo ug duha ka kaubang pusher nga sila si Rico Seno ug Miguel Seno, pulos taga Barangay Guizo sa maong dakbayan.

Ang managsuong Seno maoy una nga nadakpan nila ni Villacampa ug ilang gitug-an si Puesca nga maoy ilang supplier. Sa laing bahin, 14 ka sugarol lakip ang usa ka menor de edad ang nadakpan sa kapolisan sa Lungsod sa Minglanilla dihang naabtan nga nagtigbakay sa Purok Tres, Barangay Cadulawan niadtong Domingo sa buntag.

Apan ang konsehal sa barangay ang nakasibat human kusog nga nakadagan.

Si Police Major William Homoc, hepe sa Minglanilla Police Station, maoy nangulo sa operasyon nga nirumbo sa bakanteng luna diin gihimo ang tigbakay.

Nakadagan si Konsehal Ernesto Nabale Jr. alyas Oming apan nadakpan ang iyang kaubang sugarol nga sila si Limuel Alipin, Lupercio Alicamen, Felix Algura, Rolando Ejercito, Fernand Dela Cerna, Francisco Laturza, Romulo Laturza, Rolando Mancia, Orlando Basalo, Romeo Sedeño ug Alejandro Somocad.

Nasakmit sab ang pito ka manok nga igtatari.

Gawas niana, duha ka hamtong ug usa ka menor de edad ang nasikop tungod kay nagkalingaw sab sila og antog sa hantakan kilid sa tigbakayan.

Gibalhug sa bilanggoan ang mga dinakpan samtang gikatakda silang pasakaan og kaso.  GMR (BANATNEWS)