Heneral Valeriano wa magmahay; mohulip niya molingkod karon

CEBU, Philippines — Girelibohang director sa Police Regional Office 7 wala magsagmuyo o magmahay sa pagkatangtang kaniya ug gibalhin sa ika-17 nga pwesto sa tibuok Pilipinas didto sa Camp Crame sa kaulohan.

Si kanhi PRO7 Director Police Brigadier General Valeriano De Leon miingon nga wala siyay gibalong kasagmuyo ug nagpasalamat pa hinuon nga nahatagan siya og kahigayonan nga makaserbisyo ug nakapanamilit sa Central Visayas.

Matud niya ang kinadak-ang  kalamposan nga iyang nahimo mao ang malampusong pagbantay sa Sinulog 2020 nga malinawon gikan sa pagsugod hangtud na sa pagkahuman.

 “No hard-feelings. Orders have to be followed, orders must be complied. As a good soldier, I have to follow,” matud pa ni De Leon.

Gitan aw sab ni De Leon nga dako ang posibiliad nga ang usa sa rason sa iyang pagka relibo sa katungdanan ang giingon nga pagduwa sa golf sa tulo ka opisyal ug ang pagubos sa performance sa kalampusan sa PRO7.

Giklaro hinuon ni De Leon nga wala siya’y pagkuwang sa pahimangno sa iyang mga tawo sa mga direktiba sa ilang labaw sa PNP apan tungod sa command responsibility iya kining kaakohan.

Sa pagdumala ni De Leon sa Central Visayas diin nakasakmit kini og 46,730 gramos nga shabu kun mobalor ngadto sa 317,764,000 ug P40.1 milyones nga balor sa Marijuana.

Lakip na usab ang 1,513 ka mga wanted persons lukop Central Visayas ug pagkasikop sa 2,285 ka personalidad sa illegal gambling.

Madestino si De Leon sa buhatan ni PNP Chief Archie Francisco Gamboa uban sa lain pang mga heneral ug mga personnel nga nalutsan sa kamandoan niadtong miaging semana.

Karong buntag pormal nga molingkod sa katungdanan ang iyang classmate sa Philippine Military Academy class of 1989 nga si Police Brigadier General Albert Ignatius Ferro.  IBM (BANATNEWS)