Opisyales sa PRO7 nanumpa nga dili modawat og payola

CEBU, Philippines —  Mga opisyal sa Police Regional Office 7 mipirma og Affidavit of Undertaking nga dili sila modawat og payola gikan sa bisan unsang illegal nga mga kalihokan nunot sa mga report nga dunay mga sakop sa kapolisan nga padayong nalambigit sa mga illegal nga kalihokan bisan pa sa higpit nga kampanya sa internal cleansing sa PNP.

Ang paglagda gipangulohan sa bag-o nga regional director sa PRO7 Regional Director Albert Ferro ug sa mga opisyal sa Central Visayas.

Matud ni Ferro nga ang maong kasabutan nga gipermahan kini ang affidavit of undertaking nga “no take policy” gikan sa illegal gambling, illegal nga drugas ug uban pa nga matang sa illegal.

Dugang ni Ferro nga ang paglagda sa kasabotan mao ang pagpakita sa publiko nga seryoso sila sa ilang trabaho ug sa pakigbatok sa illegal nga drugas ug illegal gambling.

Niadtong milabay nga semana sa unang pagbisita ni Ferro sa PRO7 una na siyang mibahad nga mopatuman og 3- strike policy sa tanan nga Provincial ug City Directors sa Central Visayas. Relibohan sila sa pwesto kun malambigit sa binuang ang ilang mga sakop.

Kung mapamatud-an nga tingdawatan sa payola ang usa ka polis parelibohan kini sa katungdanan ug ipaubos sa imbestigasyong adminstratiba.

Sama sa mga nanglabay nga mga director sa kapolisan sa rehiyon, si Ferro misaad nga iyang paninguhaong mapuhag ang sindikato sa illegal nga drugas ug uban pang illegal nga mga kalihokan dinhi, butang nga hangtud karon wala pa hingpit nga nawala.

Lakip sa mga milagda ang mga regional staff, provincial ug city directors ug mga commander, deputies ug uban pang opisyal.  IBM (BANATNEWS)