Naglugos og 7-anyos nasikop

CEBU, Philippines – Suspek sa pagpanglugos sa pag-umangkon ang gidakop pinasikad sa warrant of arrest kagahapon sa buntag sa Sitio Hagnum, Lusaran, Dakbayan sa Sugbo.

Ang operasyon gilusad sa Cebu City Police Office (CCPO) City Mobile Forces Company (CMFC) nga gipangulohan sa ilang kumander nga si Police Lieutenant Colonel Randy Korret.

Ang 19-anyos nga mag-uuma giila nga top 5 most wanted sa Dakbayan sa Sugbo sa kasong pagpanglugos.

Matud ni Korret nga nagtago-tago ang suspek sa balay sa iyang apohan sa boundary sa Dakbayan sa Sugbo ug Lungsod sa Balamban.

Giangkon sa 19-anyos suspek ang krimen diin matud pa niya nga 15-anyos pa ang iyang edad sa pagbuhat niini.

Matud niya nga gibilin sa iya ang iyang pag-umangkon nga kaniadto 7-anyos pa.

Dugang pa niya nga hubog siya sa pagkahitabo ug nakasuyop og ilegal nga drugas.

Hinoon andam siya nga atubangon ang kaso ug emosyonal nga nangayo og pasaylo ngadto sa ginikanan sa biktima.

Ang 19-anyos nga suspek mao ang ika-walo sa most wanted nga nasikop sa CMFC sukad niadtong Enero 2020. /GMR (BANAT NEWS)