Lisensya sa enforcer expired, motor way rehistro

CEBU, Philippines — Naunay og dakop ang usa ka 61-anyos nga sakop sa City of Talisay-Traffic Operation Development Authority (CT-TODA) sa iyang mga kaubanan. Kini human nahibaw-an nga ang iyang lisensya expired na samtang walay rehistro ang iyang motorsiklo.

Si Jonathan Tumulak, traffic czar sa syudad, nihimo og general assembly sa CT-TODA niadtong Dominggo. Niabot ang 139 niya ka sakop samtang 41 nila ang nagmotorsiklo.

Apan gikalitan ni Tumulak og pagpahigayon og inspeksyon sa ilang mga lisensya ingon man rehistro. Walay swerte ang usa ka sakop kay siya nasakpan nga walay lisensya ug rehistro ang motorsiklo.  Giisyuhan siya og citation ticket ingon man gi-impound ang iyang motorsiklo.

Si Tumulak nagkanayon nga nagpakita lang kini nga ang manakopay limpyo o magsilbing modelo sa motorista.

Ang sakop sa CT-TODA nga gipugngan lang una ang pangan nipasabot nga nataligam-an niya ang pag-renew sa iyang lisensya ug rehistro gumikan sa ka busy nila niadtong buwan sa Disyembre. Apan si Tumulak nitataw nga dili kadto himoong rason nga momaneho gihapon og sakyanan o motorsiklo.

Hinoon gihatagan og higayon ang maong enforcer apan kung masakpan nga mao gihapon ang kalapasan taktakon gyud kini sa serbisyo.  GMR (BANATNEWS)