Nagmotor patay sa giayo nga karsada

CEBU, Philippines —  Patay ang usa ka 27-anyos nga lalaki human kini nadisgrasya sa giayo nga dalan sa may national highway sa Barangay Dawis Sur, Lungsod sa Carmen sayo sa kaadlawon kagahapon ug nibangga pa gyud kini sa laing sakyanan nga padulong sa amihanang bahin sa Lalawigan sa Sugbo.

Ang nakalas naila nga si Nikkie Catarata, minyo, taga Barangay Udlot, Dakbayan sa Bogo, kinsa nagmaneho sa motor.

Samtang ang nagmaneho sa sakyanan nga gikabangga mao si Edmund Pino, 50-anyos, minyo, taga Barangay Basak, Dakbayan sa Lapu-Lapu.

Si Caratara gikan sa amihanang bahin ug padulong sa Dakbayan sa Sugbo samtang si Pino padulong sa Lungsod sa Daanbantayan.

Matud pa ni Police Corporal Francisco Dumasig, desk officer sa Carmen Police Station, nga base sa pasiunang imbestigasyon sa ilang imbestigador nga nakasugat si Catarata og disgrasya tungod sa dili maayo nga dalan kay nagpadayon ang pagtrabaho ug didto kini nipadulong sa pikas nga linya diin nagsubay ang sakyanan ni Pino hinungdan nga kini nabangga.

Atol sa pagkaigo sa gisakyan ni Catarata, nalagpot kini gikan sa gimaneho nga motor hinungdan nga nakaangkon og mga kadaut sa kalawasan.

Dali pa unta nga gidala sa Danao City Hospital si Catarata apan gideklarar kining patay na tungod sa mga naangkon niini nga kadaut.

Ang drayber sa sakyanan kasamtangan una nga gitanggong sa buhatan sa kapolisan ug nagpaabot sa pamilya sa biktima samtang giandam ang pagsang-at sa tukmang kaso nga reckless imprudence resulting in homicide and damage to property. GMR (BANATNEWS)