P27 milyong shabu nasakmit sa bulan sa Enero
CEBU, Philippines — Mokabat ngadto sa P27 milyones nga balor sa shabu ang nasakmit sulod lang sa usa ka semana nga police operations sa tibuok Central Visayas sumala pa ni Police Regional Office 7 Director Police Brigadier General Valeriano De Leon.
Subay niini sa 10 ka mga High Value Target (HVT) sa PRO7 ang tulo niini nadakpan gikan sa Dakbayan sa Sugbo.
Sukad niadtong Enero 26 hangtud Pebrero 1 moabot sa 151 ka operasyon ang gihimo sa kapolisan ug 246 ka suspek ang nadakpan.
Sa maong mga operasyon, tulo ang namatay lakip na kadtong nakigpinusilay sa mga sakop sa Waterfront Police Station. Samtang gitahasan ni De Leon si Police Brigadier General Domingo Cabillan pangunayan ang pagtutok sa Dakbayan sa Talisay nga gihisgotan ni Pres. Duterte nga grabe pa gihapon ang problema sa illegal nga drugas.
Gidugangan og 30 ka polis ang maong siyudad aron mapalapdan pa ang ilang operasyon batok illegal nga drugas.
Sa Dakbayan sa Talisay, siyam ka gidudahang durugista ang nangadakpan niadtong adlaw’ng Domingo.
Sa pagpahigayon sa static checkpoint, nasikop sila si Ivan John Torion ug Winher Baliguat nga nakuhaan og 0.5 gram nga shabu diha sa Sitio Rattan, barangay Tanke. Sunod nadakpan si Alexis Rosales diha sa Sitio Salvador sa mao gihapong barangay atol sa buy-bust operation.
Laing nangadakpan sila si Manilyn Villariasa ug Johnny Cholo Barliso diha sa Molave Extension, Barangay Lagtang; Marzinel Jane Labita, Emmanuel Oca ug Jeffrey Ruelio diha sa static checkpoint sa Barangay San Roque.
Sa pikas bahin, mokabat sa P400 mil nga gidudahang shabu ang nasakmit sa managlahing anti-illegal drug operations sa City Intelligence Branch (CIB) sa Lapu-Lapu City Police Office (LLCPO) nga miresulta usab sa pagkasikop sa upat ka mga gikatahapang pusher nga naglakip sa usa ka babaye.
Samtang sa Cordova, suspek sa pagpamaligya og illegal nga drugas nga bag-ohay lang nakapiyansa nadakpan pag-usab sa laing buy-bust operation sa kapolisan diha sa Barangay Day-as sa maong lungsod.
Ang suspek giila nga si Ernesto Moniño Tura, 29, nga nagpuyo sa maong dapit. IBM (BANATNEWS)
- Latest