Tawo ni Jaguar, laing suspek sa tulis sikop

CEBU, Philippines — Gituohang tawo sa self-confessed drug lord nga si Jeffrey “Jaguar” Diaz ang gidakop sa buy-bust operation sa Cebu City Police Office (CCPO) City Intelligence Branch sa dalan Atillo, Barangay Punta Princesa.

Gipangulohan ang maong operasyon ni CIB chief, Police Major Randy Caballes, uban sa kapolisan sa Labangon Police Station diin nasikop si Wiljie Oliveros, 29, taga Sitio Laguna, Barangay Basak Pardo.

Matud ni Caballes nga nakadawat sila og impormasyon gikan sa mga kanhi dinakpan nga si Oliveros maoy usa nga kuhaanan nila sa drugas.

Napalitan og 25 gramos nga mobalor sa P170 mil nga shabu ang dinakpan.

Giingong makabaligya ngadto sa 100 gramos matag semana si Oliveros sa Barangay Duljo Fatima ug silingan nga mga barangay. Gikonsiderar nga high-value individual si Oliveros sa Dakbayan sa Sugbo tungod sa dinagku nga bulto sa drugas nga mabaligya.

Samtang nasikop sa kapolisan sa Presinto 5 sa Mandaue City Police Office ang pusher og shabu nga babaye atol sa buy-bust operation alas 7 pasado sa niaging Biyernes sa buntag sa Sitio Superior, Looc, Dakbayan sa Mandaue.

Si Police Major Aldrin Villacampa, hepe sa Presinto 5 sa MCPO, niila sa dinakpan nga si Charity Andrin Salazar, 24, taga Tejero, Dakbayan sa Sugbo.

Atol sa paggkasikop ni Villacampa nasakpan ang tulo ka dagkung pakete sa shabu nga ihatud unta sa lain pa customer.

Samtang sa buy-bust operation sa Presinto 3 sa MCPO nga gipangulohan ni Police Captain James Conaco sa Barangay Jagobiao nasikop ang pusher nga suspek sa mga tulis sa Lungsod sa Consolacion. Giila ang mga nadakpan nga sila si Cyle Generoso, 30, ug Karen Calderon, 28, pulos nagpuyo sa nahisgutang dapit, kinsa nasakmitan og mokabat sa P68,000 nga kantidad sa shabu. Romeo T. Limpangog/GMR (BANATNEWS)