2 chinese kutob ra MCIA

CEBU, Philippines — Aron paghupay sa kabalaka sa mga Sugboanon, si Dr. Jaime Bernadas ang regional director sa Department of Health (DOH) Central Visayas miklaro nga kadtong 38-anyos nga babayeng Chinese national nga nagpositibo sa novel coronavirus wala ni makasuroy sa Metro Cebu kay didto lang kini sa Mactan Cebu International Airport (MCIA).

Ang maong babaye kuyog sa iyang uyab nga nagestar sa airport og tulo ka oras lang gikan sa pag-abot sa MCIA ug dayon nilarga ra usab padulong sa Dumaguete City pagkahapon.

“The couple did not stay in the city- they were just in the airport,” matud ni Bernadas.

Sa pagkakaron ang DOH ug ang Bureau of Quarantine uban ang ubang ahensya nisubay sa mga tawong nakasugat sa maong mga Chinese nationals diha sa maong tugpahanan.

Limitado ra ang impormasyong gitug-an ni Bernadas bahin sa babaye ug sa uyab niini, Apan siya miingon nga naka confine kini karon sa usa ka tambalanan sa Manila.

Ang Cebu Pacific nipagawas og pamahayag sa ilang Facebook Page nga nakigalayon na sila sa DOH ug Bureau of Quarantine pagpangita sa mga pasaherong katupad sa maong pasahero sa abyon sa pagbiyahe niini niadtong Enero 21, 2020.

“We are in the process of contacting passengers seated in the vicinity of the positive NCoV patient and are taking the necessary precautions to inform them so they can have themselves checked in case they show flu-like symptoms,” matud pa sa pamahayag.

Samtang ang cabin crew ug mga piloto sa maong mga flights gipahibalo na sa hitabo apan wala hinuoy nakitang sintomas nga sila nataptan. Ang duh aka abyon nga gisakyan sa maong pasahero gipaubos na sa disinfection, samtang gipatuman na sab ang subsob nga pagpanglimpyo, disinfection sa matag flight, ug gipasul-ob og facemask ang tanan nilang crew ug frontline personnel ug uban pa aron masiguro ang kaluwasan sa tanan.

Tungod sab niini, gimenusan na nila ang flights gikan dinhi padung sa China, Hong Kong, ug Macau  sugod karong Pebrero 3 hangtud Marso 29, 2020 tungod niini.

Sa pikas bahin, si Cebu City Mayor Edgardo Labella mipadayag  nga andam ang siyudad  pagtabang sa mga ahensya sa gobiyerno batokan ang maong sakit.

Ang mayor mipatawag og tigum kauban ang mga representante sa Department of Health (DOH), Bureau of Immigration (BI), Bureau of Quarantine (BOQ), City Health Office (CHO) aron tukion ang mga buhaton batok sa maong sakit.

Ang siyudad gipaubos na karon sa state of preparedness alang sa pagpatuman sa prevention mechanism batok sa maong sakit.

Quarantine lang

Samtang si Gobernador Gwendolyn Garcia mipasabot nga wala siyay gahom nga mopa- ban sa mga Chinese nationals nga moari sa Sugbo taliwala niining novel coronavirus.

Gisaway ang gobernadora tungod sa iyang desisyon nga ipaubos sa 14 ka adlaw nga quarantine ang kadtong mga pasahero nga gikan sa China apil sa Hong Kong ug Macau ug dili i-totally ban ang mga Chinese nationals gikan China.

“The simple answer to that is it’s beyond my control. This already involves foreign policy and international relations. That is the prerogative of the President,” matud ni Garcia.

Si Garcia gikatakda kini nga moluwat og executive order pag-umol og task force batok sa coronavirus.

Magklase gihapon

Ang Regional Director sa Department of Education(DepEd)-7 Dr. Salustiano Jimenez mimando sa mga Schools Division Superintendents sa rehiyon nga makig-alayon sa mga barangay clinics ug mamalit og surgical mask aron ipanghatag sa mga tinun-an aron sila maprotektahan gikan sa maong sakit.

Matud ni Jimenez, ang gamiton sa pagpalit niini mao ang ilang pundo sa Maintenance and Other Operating Expenses (MOOE) sa tunghaan.

Apan kun wala nay mapalit, giawhag ang mga ginikanan sa pagpagamit og alternatibong proteksyon sama sa panyo kay usa kini sa pamaagi aron malikayan ang sakit.

Di uyon si Jimenez nga suspensuhon ang klase tungod kay matud niya maglaag-laag ra ang mga bata ilabi na kun nagtrabaho ang mga ginikanan.

“There is no guarantee ang mga bata dili mosuroy so magsuroy-suroy na hinoon na mas grabe nuon ang peligro so unlike if mas tigom sila sa eskwelahan. Wa sila’y laing lakawan anha ra sa campus, so mas secure pa nato mga bata labi na sa public school,” pasabot ni Jimenez.

Ang Artsidiyosis sa Sugbo mipagawas na og Oratio Imperata nga litukon ini og katapos sa Santos Misa aron mawagtang na ang maong sakit. Rowena Capistrano, Le Antojado/IBM (BANATNEWS)