Comelec positibo sa padayong pangrehistro
CEBU, Philippines – Gibutyag sa Commission on Elections sa Siyudad sa Sugbo nga nakarehistro na sila og 2,487 sukad niadtong Enero 20 hangtud 29.
Matud ni City Election Assistant Omar Mamalinta nga sa North District dunay 1,161 ang nakaparehistro samtang sa South District niabot og 1,326 ang nagparehistro.
Kini gilangkuban sa application for transfer, reactivation, correction of entries ug mga bag-o nga mga nagparehistro.
Gihulagway ni Mamalinta nga positibo ang resulta gumikan sa daghan ang bag-o nga nagparehistro ilabi na nga pagpangandam kini alang sa 2022 nga National ug Local Elections.
Gilauman nila nga 3 ngadto na sa 5 porsyento ang pagsaka unya sa mga magparehistro nga botante ilabi na kay taas nga panahon ang gihatag nga moabot usa ka tuig ug walo ka buwan.
Abli pa gyud ang Comelec sa adlaw’ng Sabado ingon man sa holidays.
“So atong gi-encourage ang wala pa maparehistro ug katong ganahan magpa-change sa ilang status, correction of entries, magpa-reactivate nga moanhi sa atong opisina. We are open Mondays to Saturdays including holidays from 8 in the morning until 5 in the afternoon, dili lang ta maghuwat nga maabtan tag deadline kay base on experience katong naabtan og deadline wala na nakaparehistro, wala na ma-accommodate,” matud ni Mamalinta. /GMR (BANAT NEWS)
- Latest