Managsuon nalumos sa dagat

CEBU, Philippines – Patay ang duha ka mga bata human sila nangalumos sa dihang nabiyaan sa inahan kay adunay gikuha sa ilang panimalay, samtang ang amahan namasol distansya ra sa mga bata diha sa may Barangay Salag, Lungsod sa Tabogon, Martes sa hapon.

Ang nakalas naila nga sila si Loren Jay Remulta, 5-anyos ug Brail Remulta, 3-anyos.

Matud pa ni Police Master Sergeant Ben Anthony Alburo, Desk Officer sa Tabogon Police Station, nidangop sa ilang buhatan ang mga ginikanan sa mga bata aron sa pagpa- blotter sa maong insidente.

Sumala pa ni Alburo, base sa initial nga imbestigasyon, giingong anaa sa baybayon ang inahan nga si Lonie kuyog sa duha ka mga bata kay namasol ang amahan niini nga si Erlito, distansya gamay sa ilang nahimutangan.

Dugang pa ni Alburo, giingong nilakaw ang inahan kay adunay gikuha sa ilang balay. Apan sa iyang pagbalik wala na diha ang mga bata sa iyang gibilinan ug sa pagpangita niini, nakita ang duha nga naglutaw-lutaw na sa dagat ug wala nay kinabuhi.

Gitug-an ni Alburo, ang mga ginikanan walay tinguha nga mopaubos sa autopsy sa kamatayon sa mga bata kay dako ilang pagtuong disgrasya ang maong insidente ug walay foul play.

Si Alburo nitug-an padayon pa mohimo ug imbestigasyon ang ilang imbestigador may kalabutan sa maong panghitabo  pagtino kung aduna bay tulobagon ang mga ginikanan. /IBM (BANAT NEWS)