Task force hulmahon batok sa coronavirus

CEBU, Philippines —  Gipaabot nga moluwat og executive order si Gob. Gwendolyn Garcia aron pagpakigbatok sa Novel Coronavirus nga nikatap karon sa nasud sa China.

Kini human sa iyang gipatawag nga tigum tali sa kadagkuan sa Mactan Cebu International Airport (MCIA), Department of Health ug uban pang ahensya aron paghisgut sa coronavirus.

Buot si Garcia nga maumol ang inter-agency task force sa probinsiya uban ang concerned agencies alang sa pagpangandam ug tinguha nga dili makasulod ang maong virus sa Sugbo. Matud ni Garcia nga ang EO susama ra kini sa iyang giluwatan batok sa African Swine Fever (ASF).

"I need to proceed with this in a most cautious and deliberate manner," matud ni Garcia kinsa nidugang nga ang maong EO suportahan pa kini og ordinansa sa hunta probinsiyal.

"We are looking at the taken the health declaration cards seriously. First on the part of the passenger to honestly and faithfully fill out this declaration cards which will be very specific, focusing on Wuhan coronavirus," dugang ni Garcia.

Ang mga pasahero nga dili magtarung sa pag-fill up sa cards posible nga silotan.

Ang Cebu Port Authority mopalit sab og thermal scanners isip preventive measure.

Samtang si DOH-7 Director Jaime Bernadas nagkanayon nga aduna silay gi-monitor nga mga langyaw nga nagpakita og sintomas sa coronavirus o respiratory illness ug adunay history sa biyahe gikan sa China.

Duha sa Metro Manila, usa sa MIMAROPA, usa sa Northern Mindanao, usa sa Eastern Visayas, tulo sa Western Visayas, ug tulo sa Central Visayas.

Samtang gihangyo ni Konsehal David Tumulak ang Cebu City Health Office (CHO) nga magduso og mga lista sa ilang mga kinahanglanon ug budget alang sa pagpugong sa Novel Coronavirus lakip na ang personal protective equipment.

Si Tumulak, chairman sa committee on disaster risk reduction and management, niingon nga ilang tumong mao ang pagpanalipod sa mga hospital ug kawani niini ug mga ambulance medics. Siya niingon nga wala’y igo nga PPE alang sa mga medical responders diin wala kaabot og 20 kabuok ang PPE nga magamit.

Kini naglakip sa sapot, helmet, goggles, o uban pang mga panapton o kagamitan nga mapanalipdan ang lawas gikan sa kadaut o impeksyon.

“We have to buy that kay mas maayo nang ready ta,” matud ni Tumulak.

“Pagpangandam lang ni, dili lang kay sa Coronavirus to see to it na ang atoang mga health responders, medical facilities capable to handle this kind of cases. Dili man ni siya pagpa-alarma nato sa atoang mga katawhan kun dili makahatag kinig assurance how to deal if in case dunay mga kaso sa ncov nga maabot dinhi sa Siyudad sa Sugbo,” dugang niya.

Siya niingon nga kinahanglang mahatagan og proteksyon ang mga “health providers.”

“If in case ang atoang mga health providers, maigo unya og mga grabe nga mga virus, dili lang kay sa ncov, kinsa may moluwas sa mga tawo?” dugang ni Tumulak.  GMR  (BANATNEWS)