Policewoman gipatay sa banang polis

CEBU, Philippines —  Away magtiayon ang gitan-aw nga motibo sa pagpusil patay sa usa ka polis sa iyang asawang polis usab diha sa Sitio Ingod, Barangay Sentri sa lungsod sa Tubigon Probinsya sa Bohol.

Giila ang biktima nga si Police Staff Sergeant Juliet Tuquib nga napalgan nalang nga patay sulod sa ilang lawak.

Matud ni Police Captain Robert Lucernas hepe sa Tubigon Police Station nga una sila nakadawat ug report nga adunay nahitabong pagpamusil.

Sa pag-abot nila sa dapit, naabtan nilang wala nay kinabuhi ang biktima nga naghigda uban sa iyang bana nga si Police Staff Sergeant Ariel Tuquib nga aduna usab samad pinusilan.

Dugang pa ni Lucernas nga sa pagsusi nila sa nahitabo gibutyag sa mga silingan nga nakadungong sila nga grabeng naglalis ang magtiayon ug nisunod dayon ang pagbuto sa armas.

“Pagresponde sa mga police, gi-locked man gud ang ilang room mao tung gipugos pa gyud og guba ang lock. So, didto na naghigda na sa floor sa ilang room, ang bana nagluya na kay naa man siya’y samad sa ulo,” matud pa ni Lucernas.

Duda sa kapolisan nga adunay giatubang nga problema sa pamilya hinungdan sa panag-away sa magtiayon nga nisangpot sa maong pagpamusil.

Nasayran usab sa inisyal nga imbestigasyon sa kapolisan nga adunay problema sa pangisip si Ariel gani gipaubos usab kini karon og medication.

“Mura’g naay problema iyang bana kay di na kaayo mo communicate ug mga tawo, mura’g lonely na kaayo ba.  Actually daghan nang medication na gi-undergo na iyang bana para lang gyud maka recover siya,” dugang pa ni Lucernas

Matud pang Lucernas, kasamtangan na untang giproseso sa magtiayon ang early retirement ni Ariel tungod sa iyang balatian.

Ang biktima kasamtangan nga nadestino sa Clarin Police Station. IBM (BANATNEWS)