Kapitolyo mohatag og P5 milyong nga hinabang sa Batangas

CEBU, Philippines —  Ang kagamhanan sa Probinsiya sa Sugbo gikataktang mohatag og P5 milyones nga hinabang ngadto sa mga naapektohan sa pagbuto sa Bulkang Taal.

Matud ni Gobernador Gwendolyn Garcia nga ang maong tabang pinansiyal ihatag sa Kapitolyo ngadto sa Probinsiya sa Batangas aron kini na ang modesisyon unsay gamitan sa maong tabang pinansiyal.

Ang maong kantidad iagi pa hinoon kini sa hunta probinsiyal aron maaprobahan.

“The assistance is to show solidarity in times of difficulty”, matud ni Garcia.

Si Garcia nagkanayon nga alang usab kini sa ilang panagkauban ni Kongresista Vilma Santos ngadto sa Kongreso kaniadto sa dihang si Garcia mao pa ang kongresista sa 3rd district sa Probinsiya sa Sugbo.

Gibutyag ni Garcia nga dili siya ang motunol sa maong hinabang ngadto sa Batangas ug posibleng si Bise Gobernador Hilario Davide III o usa sa mga provincial board ang moadto aron maoy motunol.

Ubay-ubay nga mga residente ang naapektohan gikan sa 15 ka lungsod ug dakbayan sa Batangas human sa pagbuto sa Bulkang Taal. Sa pagkakaron ang Philippine Institute of Volcanology and Seismology (Phivolcs) ni-downgrade sa alert level status sa bulkan gikan sa alert level 4 ngadto na sa alert level 3.  BDB (BANATNEWS)