Arson batok sa suspek sa sunog sa Panagdait

CEBU, Philippines —  Kasong arson ang gipasaka sa kabomberohan sa Dakbayan sa Sugbo batok sa suspek sa sunog nga niulbo sa may Sitio Panagdait, Kasambagan niadtong Domingo sa hapon nga nikalas og kinabuhi.

Ang suspek giila nga si Guillermo “Jong-Jong” Canabe Jr. samtang ang nakalas mao si Leo Armamento.

Matud ni Fire Officer 2 Emerson Arceo, lead investigator sa maong sunog, nga may intensyon gyud si Canabe sa pagsunog sa ilang balay human kini nagsiyagit-siyagit nga kini ang nagsunog sa ilang balay. Niangkon usab si Canabe nga kini ang nagsunog ug aduna usab silay mga gihuptan nga mga saksi nga magtumbok niini nga kini ang hinungdan sa sunog.

Dugang pa ni Arceo nga anaa na sa piskaliya ang motimbang sa kaso nga ilang gisang-at batok kang Canabe kinsa gi-turnover karon sa Mabolo Police Station.

Samtang ang hepe sa Mabolo Police Station, Police Major Dindo Alaras, niklaro nga ang Bureau of Fire Protection ang mopasaka sa arson samtang sila ang sa homicide tungod sa kamatayon ni Armamento.

Matud ni Alaras nga ila pa sab sutaon ang ubang butang human niangkon si Canabe nga tiggamitan og ilegal nga drugas.

Si Canabe sa iyang bahin nangayo og pasaylo sa iyang nahimo tungod kay ginerbyus siya niadtong panahona ug wala siya masayud sa iyang nahimo.

Giangkon ni Canabe nga nigamit siya og ginadiling drugas niadtong Sabado ug wala usab siyay maayong kinatulgan sulod sa pipila ka adlaw tungod sa kasaba sa ilang silingan.

Gibutyag ni Canabe nga katapusan niyang nahinumduman nga nagpasiga siya og butane kay adunay itak-ang apan wala siya masayud kung unsay sunod nga panghitabo tungod kay nagdala-dala siya og kutsilyo sa karatol kay giingong dunay mopatay kaniya.

Andam atubangon ni Canabe ang unsa mang silot nga ipahamtang batok kaniya.  GMR (BANATNEWS)